Thaenaaram | Tamil Obituary Notices | Remembrance Notices | Tamil Death Notices

விபத்தில் முதியவர் உயிரிழந்தார்

வவுனியாவில் நேற்று இடம்பெற்ற விபத்தில் முதியவர் ஒருவர் உயிரிழந்தார். இந்த நிலையில், விபத்தை ஏற்படுத்தியதாகக் கூறப்படும் இராணுவ வாகனம் அங்கிருந்து தப்பிச் சென்றுள்ளது.

வவுனியா - நெளுக்குளம் - செட்டிகுளம் வீதியில் பாரதிபுரம் 50 வீட்டுத் திட்ட சந்திக்கு அண்மையில் உள்ள தம்பனைப் புளியங்குளம் பகுதியில் நேற்று வெள்ளிக்கிழமை மதியம் இந்த விபத்து இடம்பெற்றுள்ளது.

இந்தச் சம்பவம் குறித்து மேலும் அறிய வருவதாவது,

வவுனியா- நெளுக்குளம் பகுதியில் இருந்து செட்டிகுளம் நோக்கிச் சென்ற பெண் ஒருவரின் மோட்டர் சைக்கிள் ஒன்று பாரதிபுரம் 50 வீட்டுதிட்ட சந்திக்கு அண்மித்த தம்பனை புளியங்குளம் பகுதியில் பயணித்துக் கொண்டிருந்த போது எதிர் திசையில் வந்த முதியவர் ஒருவரின் மோட்டர் சைகிளுடன் மோதி விபத்துக்குள்ளானது.

இந்த விபத்தில் முதியவர் வீதியில் விழுந்துள்ளார். அந்தச் சமயம் பின்னால் வந்த இராணுவ வாகனம் ஒன்று முதியவரின் தலையில் ஏறியுள்ளது. இதில் முதியவர் தலை நசுங்கி அந்த இடத்திலேயே உயிரிழந்தார்.

ஆனால், முதியவரின் மரணத்துக்குக் காரணமானது என்று கூறப்படும் இராணுவ வாகனம் அந்த இடத்தில் நிற்காது உடனேயே அங்கிருந்து தப்பிச் சென்றுவிட்டதாகக் கூறப்படுகின்றது.

இந்த சம்பவத்தில் வவுனியா, விநாயகபுரத்தைச் சேர்ந்த தர்மராஜா (வயது 64) என்பவரே உயிரிழந்தவராவார்.

சம்பவம் தொடர்பில் பொலிஸார் விசாரணைகளை மேற்கொண்டு வருகின்றனர்.