Thaenaaram | Tamil Obituary Notices | Remembrance Notices | Tamil Death Notices

இலங்கை தென்கிழக்கு பல்கலைக்கழகத்தின் 14 ஆவது பொது பட்டமளிப்பு விழா பல்கலைக்கழக ஒலுவில் வளாக மாநாட்டு மண்டபத்தில் இன்று ஆரம்பமாகியது இன்று 7 ஆம் திகதி தொடக்கம் 10 ஆம் திகதி வரை இப்பொதுப் பட்டமளிப்பு விழா நடைபெறவிருக்கின்றது.

இதன்படி நான்கு நாட்களுக்கு பட்டமளிப்பு விழா நிகழ்வுகள் இடம்பெறவுள்ளதுடன் தினமும் இரு அமர்வுகளாக 8 அமர்வுகள் இடம்பெறவுள்ளன.

பல்கலைக்கழக உப வேந்தர் பேராசிரியர் கலாநிதி றமீஸ் அபூபக்கர் தலைமையில் பட்டமளிப்பு விழா இன்று ஆரம்பமாகியதுடன் இன்றைய அமர்வின் ஆரம்ப நிகழ்வில் கல்வி அமைச்சின் செயலாளர் கபில பெரோரா சூம் தொழிநுட்பம் மூலம் சிறப்புறையாற்றினார்.
இன்றைய முதலாம் இரண்டாம் அமர்வுகளில் பிரயோக விஞ்ஞானங்கள், பொறியியல் பீடத்தினைச் சேர்ந்த 475 மாணவர்களும், கலை பீடத்தினைச் சேர்ந்த 219 மாணவர்களும் பட்டங்களைப் பெற்றுக் கொண்டனர்.
இன்றைய பட்டமளிப்பு விழா அமர்வுகளுக்கு வருகை தந்தோர் சுகாதார வழிமுறைகளுக்கமைய அனுமதிக்கப்பட்டதுடன் அனுமதி அட்டை கொவிட் தடுப்பூசி அட்டை என்பவற்றுடன் வருகை தந்தோர் பட்டமளிப்பு விழா வளாகத்திற்குள் அனுமதிக்கப்பட்டனர்.

இன்றைய ஆரம்ப விழாவில் பட்டம்பெற்ற மாணவர்களுடன் பெருமளவில் அவர்களது பெற்றோர்களும் கலந்து கொண்டமை குறிப்பிடத்தக்கது.

இதேவேளை நாளை 8 ஆம் திகதி நடைபெறும் பட்டமளிப்பு விழா அமர்வில் உயர் நீதிமன்ற நீதி அரசர் திலீப் நவாஸ் கலந்து கொள்ள இருப்பதுடன் அடுத்துவரும் அமர்வுகளில் பல்கலைக்கழக மாணியங்கள் ஆணைக்குழுவின் தலைவர் சமபத் அமரதுங்க றுகுணு பல்கலைக்கழக பேராசிரியர் காமினி சேனனாயக்க ஆகியோர் கலந்து சிறப்பிக்கவுள்ளனர்.

மேலும் இப் பொதுப் பட்டமளிப்பு விழாவில் பேராதனை பல்கலைக்கழக ஓய்வு பெற்ற பேராசிரியர் எஸ்.தில்லை நாதன், தென்கிழக்குப் பல்கலைக்கழக முன்னாள் பதிவாளர் ஜௌபர் சாதிக் ஆகியோருக்கு கௌரவ கலாநிதிப் பட்டங்கள் வழங்கப்படவுள்ளதாக பல்கலைக்கழக ஊடகப்பிரிவு செயலாளர் பேராசிரியர் எம்.ஏ.எம்.பௌஸர் தகவல் தெரிவித்தார்.

இந்த பொதுப் பட்டமளிப்பு விழாவின் போது மொத்தமாக 2621 மாணவர்கள் பட்டங்களை பெறவுள்ளனர்.

இன்று ஆரம்பமாகிய இப்பொதுப் பட்டமளிப்பு விழா ஏற்பாடுகள் வெகு விமரிசையாகவும் சிறப்பாகவும் அமைந்திருந்தமை குறிப்பிடத்தக்கதாகும்.