Thaenaaram | Tamil Obituary Notices | Remembrance Notices | Tamil Death Notices

சாய்ந்தமருது பிரதேச வைத்தியசாலையில் புதிதாக ஆரம்பிக்கப்பட்டுள்ள சத்திர சிகிச்சை கூட திறப்பு விழா சிறப்பாக இடம்பெற்றது.

சாய்ந்தமருது பிரதேச வைத்தியசாலையின் மாவட்ட வைத்திய அதிகாரி டாக்டர் எம்.எச்.கே. சனூஸ் தலைமையில் நடைபெற்ற இந்த திறப்பு விழா நிகழ்வில் கல்முனை பிராந்திய சுகாதார சேவைகள் பணிப்பாளர் டாக்டர் ஐ.எல்.எம். றிபாஸ், கல்முனை பிராந்திய திட்டமிடல் வைத்திய அதிகாரி டாக்டர் எம் சி எம் மாஹிர், சாய்ந்தமருது பிரதேச சுகாதார வைத்திய அதிகாரி டாக்டர் நியாஸ், வைத்தியசாலை அபிவிருத்தி சபையின் செயலாளர் எம்.ஐ.எம். சதாத், சாய்ந்தமருது பிரதேச வைத்தியசாலையின் வைத்திய அதிகாரிகளான டாக்டர் ஜே. சிவாசுப்ரமணியம், டாக்டர் திருமதி எம்.ஏ. கரீமா சனூஸ், தாதிய மேற்பார்வை உத்தியோகத்தர் பி.எம். நஸ்ருதீன், முகாமைத்துவ சேவை உத்தியோகத்தர் ஏ. புஹாது ஆகியோர் கலந்து கொண்டனர்.

கல்முனைப் பிராந்தியத்தில் உள்ள பிரதேச வைத்திய சாலைகளில் ஒரே ஒரு ஏ (A) தர வைத்தியசாலையான இவ் வைத்தியசாலை ஆரம்ப சுகாதார சேவை மேம்படுத்தல் திட்டத்தின் கீழ் உள்வாங்கப்பட்டு அதன் சேவைகள் விரிவுபடுத்தப்பட்டு வருகின்றமை குறிப்பிடத்தக்கதாகும்.

இதற்கமைய வாரந்தோறும் வெள்ளிக்கிழமைகளில் சிறு சத்திர சிகிச்சைகள் இங்கு மேற்கொள்ளப்பட உள்ளன. சத்திர சிகிச்சைப் பிரிவில் சுமார் 18 வருடங்கள் சேவையாற்றிய அனுபவத்தைக் கொண்ட டாக்டர் எம்.எச்.கே. சனூஸ் தலைமையிலான குழுவினர் இந்த சத்திர சிகிச்சைகளை மேற்கொள்ள உள்ளமை குறிப்பிடத்தக்கதாகும்.

மேலும் சாய்ந்தமருது பிரதேச வைத்தியசாலையில் வருகைதர பொது வைத்திய நிபுணரின் சேவையும் ஏற்படுத்தப்பட உள்ளதுடன், தோல் வைத்திய நிபுணரின் சேவை ஏற்கனவே ஆரம்பிக்கப்பட்டு சிறப்பாக இடம்பெற்று வருகின்றமையும் குறிப்பிடத்தக்கது

அத்துடன் இவ் வைத்தியசாலையின் மருத்துவ ஆய்வுகூட சேவை விஸ்தரிக்கப்பட்டுள்ளது. அரை மணிநேர காலத்திற்குள் அனைத்து விதமான மருத்துவ பரிசோதனைகளையும் மேற்கொள்ளக்கூடிய சுமார் 50 லட்சம் ரூபா பெறுமதியான நவீன உபகரணங்கள் பீ.எஸ்.எஸ்.பீ திட்டத்தின் கீழ் வைத்தியசாலைக்கு வழங்கப்பட்டுள்ளமை குறிப்பிடத்தக்கதாகும்.