Thaenaaram | Tamil Obituary Notices | Remembrance Notices | Tamil Death Notices

இலங்கை தென்கிழக்கு பல்கலைக்கழகத்தின் 14 ஆவது பொதுப்பட்டமளிப்பு விழா இன்றுடன் நிறைவு பெற்றுள்ளது.
பல்கலைக்கழக உபவேந்தர் கலாநிதி றமீஸ் அபூபக்கர் தலைமையில், பல்கலைக்கழக ஒலுவில் வளாக மாநாட்டு மண்டபத்தில் வெகு சிறப்பான ஏற்பாடுகளுடன் இந்த பொது பட்டமளிப்பு விழா நடைபெற்று நிறைவு பெற்றுள்ளது.
கடந்த 7 ஆம் திகதி திங்கட் கிழமை தொடக்கம் ஆரம்பமான இந்த பொதுப்பட்டமளிப்பு விழா தினமும் இரு அமர்வுகளாக நான்கு தினங்கள் நடைபெற்றன.

எட்டு அமர்வுகளாக இடம்பெற்ற இந்த பொது பட்டமளிப்பு விழாவில் மொத்தமாக 2621 மாணவ, மாணவியர்கள் பட்டங்களைப் பெற்றுக் கொண்டனர்.

பட்டமளிப்பு விழா நடைபெற்ற நான்கு தின அமர்வுகளிலும் முறையே கல்வி அமைச்சின் செயலாளர் கபில பெரேரா, உயர் நீதிமன்ற நீதியரசர் ஏ.எச்.எம்.திலீப் நவாஸ், பல்கலைக்கழக மானியங்கள் ஆணைக்குழுவின் தலைவர் சம்பத் அமரதுங்க, றுகுணு பல்கலைக்கழக பேராசிரியரும், இலங்கை விவசாய ஆராய்ச்சி கொள்கைத் திட்ட தலைவருமான காமினி சேனநாயக்க ஆகியோர் சிறப்புரைகள் ஆற்றினர்.

அத்துடன் இந்த பொதுப்பட்டமளிப்பு விழாவின் சிறப்பு அம்சமாக பேராதனை பல்கலைக்கழக தகைசார் பேராசிரியர் எஸ். தில்லைநாதன், தென்கிழக்கு பல்கலைக்கழகத்தின் ஸ்தாபகப் பதிவாளர் ஏ.எல். ஜௌபர் சாதிக் ஆகியோர் கௌரவ கலாநிதிப்பட்டங்கள் வழங்கி கௌரவிக்கப்பட்டனர்.

இன்றைய இறுதி 7 ஆம், 8 ஆம் அமர்வுகளில், முகாமைத்துவ, வர்த்தக பீடத்தினைச் சேர்ந்த 348 பேரும், கலை, கலாச்சார பீட மற்றும் முகாமைத்துவ வர்த்தக பீடங்களின் 312 வெளிவாரி மாணவர்களும் தமது பட்டங்களைப் பெற்றுக் கொண்டனர்.

சகாதார வழிமுறைகளுக்கேற்ப சிறந்த ஏற்பாடுகளுடன் இப்பொதுப் பட்டமளிப்பு விழா நடைபெற்றமை குறித்தும், குறிப்பாக பல்கலைக்கழகம் அமைந்துள்ள ஒலுவில் வளாக மாநாட்டு மண்டபத்திலேயே பொதுப் பட்டமளிப்பு விழா ஏற்பாடு செய்யப்பட்டமை குறித்தும் பெற்றோர் மாணவர்கள், கல்விச் சமூகத்தினர், உபவேந்தர் பேராசரியர் கலாநிதி ரமீஸ் அபூபக்கர் மற்றும், பல்கலைக்கழக சமூகத்தினர், பட்டமளிப்பு விழா ஏற்பாட்டுக் குழுவினருக்கும், பெரும் பாராட்டும், நன்றிகளையும் தெரிவித்துள்ளமை குறிப்பிடத்தக்கது.