அஷ்ரபின் கனவு

“இலங்கை தென்கிழக்கு பல்கலைக்கழகத்தின் ஸ்தாபகர் மறைந்த தலைவர் மர்ஹூம் அஷ்ரப், இப்பல்கலைக்கழகம் தொடர்பில் தூர நோக்குடன் கண்ட சில கனவுகள் நிறைவேறாமலுள்ளன. அவரது கனவுகளை நனவாக்க பல்கலைக்கழக சமூகம் சலியாது முயற்சிகளை முன்னெடுக்க வேண்டும்.”

இவ்வாறு மீயுயர் நீதிமன்ற (உயர் நீதிமன்ற) நீதியரசர் ஏ.எச்.எம். திலீப் நவாஸ் அறைகூவல் விடுத்தார்.

இலங்கை தென்கிழக்குப் பல்கலைக்கழக 14 ஆவது பொதுப்பட்டமளிப்பு விழாவின் இன்றைய இரண்டாம் நாள் அமர்வில் சிறப்புரையாற்றுகையிலேயே அவர் மேற்கண்டவாறு கூறினார்.

பல்கலைக்கழக உபவேந்தர் பேராசிரியர், கலாநிதி ரமீஸ் அபூபக்கர் தலைமையில், பல்கலைக்கழக ஒலுவில் வளாக மாநாட்டு மண்டபத்தில் இந்த பொதுப் பட்டமளிப்பு விழா நடைபெற்று வருகின்றது.

இன்றைய 2 ஆம் நாள் 3 ஆம் அமர்வில் கலைப்பீடத்தினைச் சேர்ந்த 348 மாணவர்களும், 4 ஆம் அமர்வில் இஸ்லாமிய கற்கைகள், அரபு மொழிபீடத்தைச் சேர்ந்த 329 மாணவர்களும் பட்டங்களைப் பெற்றுக் கொண்டனர்.

மீயுயர் நீதிமன்ற நீதியரசர் திலீப் நவாஸ் தொடர்ந்து சிறப்புரையாற்றுகையில் பின்வருமாறு கூறினார்.

“தென்கிழக்கு பல்கலைக்கழகத்தின் ஸ்தாபகர் மர்ஹூம் எம்.எச்.எம். அஷ்ரப் தூர நோக்குடனான சிந்தனைகளை பல கனவுகளைக் கொண்டிருந்தார்.

குறிப்பாக இப்பல்கலைக்கழகத்தில் சட்ட பீடமொன்றை நிறுவ வேண்டுமென்றும், அதில் தாமும் ஒரு விரிவுரையாராகக் கடமையாற்ற வேண்டுமென்ற அவரது ஆசையை, மன ஆதங்கத்தை அடிக்கடி எம்முடன் பகிர்ந்து கொள்வார்.

அதேபோல் கல்முனை அஷ்ரப் ஞாபகாரத்த வைத்தியசாலையை போதனா வைத்தியாசலையாக அபிவிருத்தி செய்து அதனுடனிணைந்ததாக மருத்துவ பீடம் ஒன்றை உருவாக்குவதும் அவரது எதிர்கால கனவுகளில் ஒன்றாகவுமிருந்தது.

எனவே அவரது இது போன்ற கனவுகள் எண்ணங்கள் நிஜமாக வேண்டும். இதற்காக பல்கலைக்கழக சமூகம் மிகுந்த ஆர்வத்துடன் முயற்சிகளை மேற்கொள்ள வேண்டும்.

மேலும் எமது மாணவர்கள் பொது மொழியான ஆங்கிலத்திற்கு முக்கியத்துவம் கொடுத்து உயர் கல்விகளைத் தொடர வேண்டும். உங்களை நீங்களே வளமாக்கிக் கொள்ள வேண்டும். பெற்றோர்களின் எதிர்பார்ப்பும், நம்பிக்கையும் நிறைவேற நமது முயற்சிகள் அமைய வேண்டும். இன்று உலக நாடுகள், குறிப்பாக வளர்ந்து வரும் நாடுகள் ஆங்கில வாண்மைக்கு அளித்துவரும் முன்னுரிமைக்கு ஏற்ப, ஆங்கிலத்திலேயே எல்லாப்பாட நெறிகளும் அமைய வேண்டும்” என்றார்.