Thaenaaram | Tamil Obituary Notices | Remembrance Notices | Tamil Death Notices

மண் சரிவு எச்சரிக்கை!

சீரற்ற காலநிலை காரணமாக ஆறு மாவட்டங்களுக்கு இன்று வியாழக்கிழமை மாலை 4 மணி முதல் 24 மணித்தியாலங்களுக்கு மண்சரிவு அபாய எச்சரிக்கை விடுக்கப்பட்டுள்ளது.

களுத்துறை, கண்டி, கேகாலை, மாத்தறை, நுவரெலியா மற்றும் இரத்தினபுரி ஆகிய மாவட்டங்களுக்கே இவ்வாறு மண்சரிவு அபாய எச்சரிக்கை விடுக்கப்பட்டுள்ளதாக தெரிவிக்கப்பட்டுள்ளது.

பல்கலைக்கழக அனுமதிக்கான நேர்முகத்தேர்வு ஒத்திவைப்பு!

பாடநெறிசாரா நடவடிக்கைகளில் தேர்ச்சி பெற்ற மாணவர்களுக்கான 2022/2021 கல்வியாண்டுக்குரிய பல்கலைக்கழக அனுமதிக்கான நேர்முகத்தேர்வு ஒத்திவைக்கப்பட்டுள்ளதாக பல்கலைக்கழக மானியங்கள் ஆணைக்குழு தெரிவித்துள்ளது.

இன்று வெள்ளிக்கிழமை குறித்த நேர்முகத்தேர்வுகளை நடத்துவதற்கு திட்டமிடப்பட்டிருந்தது.

எனினும், நாட்டின் தற்போதைய சூழ்நிலை காரணமாக அதனை ஒத்திவைக்க தீர்மானித்துள்ளதாக பல்கலைக்கழக மானியங்கள் ஆணைக்குழு தலைவர் சிரேஷ்ட பேராசிரியர் சம்பத் அமரதுங்க தெரிவித்தார்.

5 மணி நேரம் மின் தடை?

இன்று காலை 6 மணியுடன் ஊரடங்கு தளர்த்தப்பட்டால் மின் வெட்டு நடைமுறைப்படுத்தப்படும் நேரம் 05 மணித்தியாலங்களாக அதிகரிக்கும் என்று பொதுப் பயன்பாட்டு ஆணைக்குழு அறிவித்துள்ளது.

இன்றும், நாளையும் சுழற்சி முறையில் மூன்று மணி 20 நிமிடங்களுக்கு மின் துண்டிப்பு மேற்கொள்ளத் தீர்மானிக்கப்பட்டுள்ளது.

பிரதிச் சபாநாயகர் பதவிக்கு 17 ஆம் திகதி மீண்டும் தேர்தல்

இரண்டாவது தடவையாகப் பிரதிச் சபாநாயகராகத் தெரிவு செய்யப்பட்ட ரஞ்சித் சியம்பலாப்பிட்டிய தன் பதவியை மீளவும் ராஜினாமாச் செய்துள்ள நிலையில், பிரதிச் சபாநாயகரை தெரிவு செய்யும் தேர்தல் எதிர்வரும் செவ்வாய்க் கிழமை 17ஆம் திகதி பாராளுமன்றம் கூடும் போதும் முதல் விடயமாக நடைபெறும்.

அதை அடுத்து ஏற்கனவே ஜனாதிபதிக்கு எதிராக சமர்ப்பிக்கப்பட்டுள்ள பிரேரணையை விவாதத்துக்கு எடுப்பதற்கான நடவடிக்கை முன்னெடுக்கப்படும்.

நேற்று முற்பகல் பாராளுமன்றத்தில் சபாநாயகர் தலைமையில் நடைபெற்ற கட்சித் தலைவர்களின் கூட்டத்தில் இந்த முடிவு எடுக்கப்பட்டுள்ளது.

ஏற்கனவே ஜனாதிபதிக்கு எதிராக நம்பிக்கை இல்லாப் பிரேரணை ஒன்றை பிரதான எதிர்க்கட்சியான ஐக்கிய மக்கள் சக்தி சமர்ப்பித்துள்ளது.

அதனை நம்பிக்கையில்லாப் பிரேரணை என்ற வடிவத்தில் எடுப்பதற்கு சபாநாயகர் மறுத்துவிட்டார்.

ஜனாதிபதியின் நடவடிக்கைகள் குறித்து அதிருப்தி வெளியிடும் பிரேரணையாக அதன் வாசகங்களை மாற்றினால் அதனைச் சபையில் எடுப்பதற்கு அனுமதிக்க முடியும் என்று சபாநாயகர் ஏற்கனவே தம் முடிவை அறிவித்து இருக்கின்றார் என்பது தெரிந்ததே.

அதன்படி வாசகங்களை மாற்றி அதனை உடனடியாக பாராளுமன்றில் வாதத்துக்கு எடுக்க எதிர்க்கட்சிகள் கேட்டுக் கொண்டுள்ளன. எனினும் இத்தகைய பிரேரணை ஏதும் சமர்ப்பிக்கப்பட்டு ஐந்து நாடாளுமன்ற அமர்வு நாள்கள் பூர்த்தியான பின்னரே அதனை சபையில் விவாதத்துக்கு எடுக்க முடியும் என்பது பாராளுமன்ற நிலையியல் கட்டளை விதியாகும்.

ஆகவே, இப் பிரேரணையை 17 ஆம் திகதி சபையில் எடுப்பதாயின், அதற்காக பாராளுமன்ற நிலையியற் கட்டளைகளை இடைநிறுத்தும் பிரேரணை ஒன்று அதற்கு முன் சபையில் சமர்ப்பிக்கப்பட்டு நிறைவேற்றப்படவேண்டும் என்று சுட்டிக்காட்டப்பட்டது. அதை எதிரணி செய்வதற்கு அனுமதிக்க நேற்றைய கூட்டத்தில் சபாநாயகர் இணக்கம் தெரிவித்தார்.

இதன்படி, 17ஆம் திகதி செவ்வாய்க் கிழமை காலையில் பாராளுமன்றம் கூடியதும் முதலில் பிரதி சபாநாயகர் தேர்வு நடைபெறும். அதைத்தொடர்ந்து நிலையியற் கட்டளைகளை இடை நிறுத்தும் பிரேரணை ஒன்றை எதிரணி சமர்ப்பிக்கும். அது பாராளுமன்றத்தில் நிறைவேற்றப்பட்டால், ஜனாதிபதியின் நடவடிக்கை கள் குறித்து அதிருப்தி தெரிவிக்கும் பிரேரணை சபையில் விவாதத்துக்கு எடுத்துக் கொள்ளப்படும் என நாடாளு மன்ற வட்டாரங்கள் தெரிவித்தன.