Thaenaaram | Tamil Obituary Notices | Remembrance Notices | Tamil Death Notices

ஆள்கடத்தலில் அகப்பட்டோர் விளக்க மறியலில்

திருகோணமாலையை சேர்ந்த 11 பேரை தமிழகத்துக்கு அழைத்துச் செல்ல முயன்ற படகோட்டிகள் இருவரை விளக்கமறியலில் வைக்க நீதிமன்றம் உத்தரவிட்டுள்ளது.

பலாலி, அன்ரனிபுரத்தை சேர்ந்த படகோட்டிகளே இவ்வாறு விளக்க மறியலில் வைக்கப்பட்டுள்ளனர். இவர்கள் கடந்த வெள்ளிக்கிழமை இரவு திருகோணமலையை சேர்ந்த 3 ஆண்கள், 3 பெண்கள், 5 சிறுவர்களை பலாலி கடற்பரப்பு ஊடாக தமிழகம் நோக்கி படகில் பயணித்திருந்தனர்.

அந்த சமயம் கடலில் கண்காணிப்பில் ஈடுபட்டிருந்த கடற்படையினர் அவர்களை கைது செய்ததுடன், அவர்களின் படகையும் வெளியிணைப்பு இயந்திரம், எரிபொருள் என்பவற்றையும் கைப்பற்றினர்.

கைதான 13 பேரையும் சட்ட நடவடிக்கைகாக பலாலி பொலிஸாரிடம் கடற்படை ஒப்படைத்தது. மேலதிக விசாரணைகளை மேற்கொண்ட பொலிஸார் அவர்களை மல்லாகம் நீதிவான் முன்னிலையில் முற்படுத்தினர். அத்துடன், சான்று பொருட்களையும் மன்றில் பாரப்படுத்தினர்.

வழக்கை விசாரித்த மல்லாகம் நீதிவான், படகோட்டிகள் இருவரையும் எதிர்வரும் 12ஆம் திகதி வரை விளக்கமறியலில் வைக்க உத்தரவிட்டார். அத்துடன், ஏனை 11 பேரையும் பிணையில் செல்ல அனுமதித்தார். அத்துடன், இந்த வழக்கை 12ஆம் திகதிக்கும் ஒத்திவைத்தார்.

எரிபொருள் தட்டுப்பாடு - நுகர்வோர் பாதிப்பு
எரிபொருள் தட்டுப்பாடு உள்ளிட்ட பல்வேறு பிரச்னைகளால் வடக்கு மாகாணத்தில் கடல் மீன்களின் விலை கடுமையாக உயர்ந்துள்ளதால் நுகர்வோர் பாதிக்கப்பட்டுள்ளனர்.

மன்னார், முல்லைத்தீவு, கிளிநொச்சி, யாழ்ப்பாணம் ஆகிய கடற்பரப்புகளில் நாளாந்தம் மீன்பிடித்தல் இடம்பெற்று வருகின்ற போதிலும், கடந்த சில நாட்களாக மீனவர்கள் மீன்பிடிக்க கடலுக்குச் செல்ல முடியாத நிலை ஏற்பட்டுள்ளது. இந்த நிலையில் மீன்களின் விலை பாரியளவில் அதிகரித்துள்ளதாக தெரிவிக்கப்படுகின்றது.

எரிபொருள் விலை கடுமையாக உயர்ந்துள்ள நிலையில், கடற்தொழிலாளர்களுக்கு எரிபொருளுக்கு அதிக பணம் செலுத்த நேரிடுவதன் காரணமாக மீன்களின் விலைகள் பாரியளவில் அதிகரித்துள்ளதாக கடற்றொழில் சங்கங்கள் சுட்டிக்காட்டியுள்ளன.

அதிகமாக விற்பனையாகும் மீன்கள் கிலோ 2000 ரூபாவை எட்டியுள்ளதாகவும், இறால் மற்றும் நண்டு 1600 - 1800 ரூபாய்க்கு இடைப்பட்ட விலைகளில் விற்பனை செய்ய நேரிட்டுள்ளதாகவும் மீன் விற்பனையாளர்கள் தெரிவித்தனர்.

குறித்த மீன்கள் இதற்கு முன்பு ஒரு கிலோ 700 ரூபாய் முதல் 1000 ரூபாய் வரையான விலையில் விற்பனை செய்யப்பட்டுள்ள நிலையில் இரட்டிப்பு விலை அதிகரிப்பு என்பது தாங்கிக் கொள்ள முடியாததெனவும் வடக்கு மாகாண மக்கள் தெரிவித்துள்ளனர்.