Thaenaaram | Tamil Obituary Notices | Remembrance Notices | Tamil Death Notices

மனிதன் தன் முன்னேற்றத்தால் ஓடைகளுக்கும், ஆறுகளுக்கும், மரங்களுக்கும், விலங்குகளுக்கும் செய்துள்ள கேடு கொஞ்ச நஞ்சமல்ல. அதனால்தான் இயற்கை அவ்வப்போது மக்களுக்கு பல்வேறு அச்சுறுத்தல்களையும், தடைகளையும் ஏற்படுத்துகிறது. இவற்றில் இருந்து விடுபட இயற்கையை நேசிக்க வேண்டும் என கௌரவ பிரதமர் மஹிந்த ராஜபக்ஷ அவர்கள் தெரிவித்தார்.

தேசிய நாமல் உயன 31வது ஆண்டு நிறைவு விழா மற்றும் தேசிய நாமல் உயன சர்வதேச சுற்றாடல் அமைப்பின் அங்குரார்ப்பண நிகழ்வில் வெள்ளிக்கிழமை (18) பிற்பகல் கலந்து கொண்டு உரையாற்றிய போதே பிரதமர் அவர்கள் இவ்வாறு தெரிவித்தார்.

தேசிய நாமல் உயன சர்வதேச சுற்றாடல் அமைப்பின் கௌரவ உறுப்புரிமையை தேசிய நாமல் உயன நிறுவனர் வண. வனவாசி ராகுல தேரர் மஹிந்த ராஜபக்ஷவிடம் வழங்கினார். அதனை தொடர்ந்து சர்வதேச சுற்றுச்சூழல் அமைப்பின் புதிய இணையதளத்தை பிரதமர் ஆரம்பித்து வைத்தார்.

சுற்றாடல் அமைப்பின் செயற்பாட்டு உறுப்புரிமை அமைச்சர் நாமல் ராஜபக்ஷவுக்கும், வாழ்நாள் உறுப்புரிமை இராஜாங்க அமைச்சர் விதுர விக்கிரமநாயக்க மற்றும் முன்னாள் சபாநாயகர் கரு ஜயசூரிய ஆகியோருக்கும் வழங்கி வைக்கப்பட்டது.

நிகழ்வில் பிரதமர் ஆற்றிய முழுமையான உரை வருமாறு;

நாமல் தேசிய பூங்கா போன்றதொரு பெறுமதிமிக்க பாரம்பரியம் எமது தாயகத்தில் இருப்பதையிட்டு நாம் உண்மையிலேயே மகிழ்ச்சியடைய வேண்டும்.

சுமார் 2000 ஏக்கரலான இந்த நிலப்பரப்பில் கி.மு. 3ஆம் நூற்றாண்டில் தேவநம்பியதிஸ்ஸ மன்னன் காலத்தில் அனுராதபுர காலத்தின் பல பழங்கால இடிபாடுகள் காணப்படுகின்றன. நான்காம் தப்புல மன்னன் காலத்தில் இந்த நா உயன மக்களின் புகலிடமாக மாற்றப்பட்டதாகவும் கடிதத்தில் குறிப்பிடப்பட்டுள்ளது.

இந்த பூங்காவில் நமது தேசிய மரமான நாக மரம் தவிர, சுமார் 18 வகையான பறவைகள் மற்றும் 72 மருத்துவ தாவரங்கள் உள்ளன.

மனிதர்கள் மற்றும் விலங்குகள் இரண்டும் வாழ்வதற்கான வளங்களை பூமி நமக்கு அளித்துள்ளது என்றே கூற வேண்டும்.

ஆனால், மனிதன் தன் முன்னேற்றத்தால் ஓடைகளுக்கும், ஆறுகளுக்கும், மரங்களுக்கும், விலங்குகளுக்கும் செய்துள்ள கேடு கொஞ்ச நஞ்சமல்ல.

அதனால்தான் இயற்கை அவ்வப்போது மக்களுக்கு பல்வேறு அச்சுறுத்தல்களையும் தடைகளையும் ஏற்படுத்துகிறது. இவற்றில் இருந்து விடுபட இயற்கையை நேசிக்க வேண்டும்.

நமது நாட்டில் பல்லுயிர் பெருக்கம் கொண்ட மிக முக்கியமான சுற்றுச்சூழல் மண்டலங்கள் உள்ளன. அவை பாதுகாக்கப்பட வேண்டிய வரலாற்று தொல்பொருள் மற்றும் சுற்றுச்சூழல் முக்கியத்துவம் வாய்ந்தவை.

அவற்றைப் பாதுகாக்கும் ஒரு சூழலியல் நிபுணர் எங்களிடம் இருக்கிறார். அவர்தான் வணக்கத்துக்குரிய வனவாசி ராகுல தேரர்.

இந்த நாமல் உயன வனப் பகுதி எமது வணக்கத்திற்குரிய ராகுல தேரரின் அளப்பரிய அர்ப்பணிப்பினாலும் துணிச்சலினாலும் பாதுகாக்கப்படுகின்றது.

சுற்றுச்சூழலை நேசிக்கும் துறவியான அவர் மிகவும் உணர்திறன் உடையவர். இந்த நாமல் உயனவையும் ரோஜா தோட்ட பொக்கிஷத்தையும் தன் உயிரை காப்பாற்றுவது போல் பாதுகாத்து வருகிறார்.

பல்வேறு சவால்கள் மற்றும் அச்சுறுத்தல்களுக்கு முகங்கொடுத்து 31 வருடங்களுக்கு மேலாக தனது உயிரைப் பணயம் வைத்து இந்த தேசியப் பொறுப்பை நிறைவேற்றியுள்ளார். அவர் என்னுடன் மிகவும் நட்பாக இருக்கிறார்.

அதனால் தான் நான் ஜனாதிபதியாக இருந்த போது இதற்கு முன்னரும் மூன்று தடவைகள் இந்த புனித இடத்திற்கு சென்று எமது தேரரை தரிசித்திருந்தேன். அத்துடன் அவரது அறிவுரைகளால் நானும் எனது பிள்ளைகளும் தொடர்ந்து ஆசீர்வதிக்கப்படுகிறோம் என்பதையும் குறிப்பிட வேண்டும்.

எமது வணக்கத்துக்குரிய தேரரின் இந்த வரலாற்றுப் பொறுப்பை நான் பிறக்காத குழந்தை தலைமுறைக்கு செய்யும் கடமையாகவே பார்க்கிறேன்.

இந்த தேசிய நாமல் உயனை மத்திய கலாசார நிதியத்திடம் கையளித்து மிகவும் முன்மாதிரியான பணியை தேரர் செய்தார்.

அவர் தனது முன்மாதிரியான பணிக்காக ஜனாதிபதியின் பசுமை விருதைப் பெற்றார் என்பதையும் நினைவுபடுத்த விரும்புகிறேன். ஒரு துறவிக்கு ஜனாதிபதி ஒருவர் இந்த பசுமை விருதை வழங்குவது அரசாங்கமாக இதுவே முதல் முறை என்று நினைக்கிறேன்.

திருகோணமலை பேராயர்களும் கூட எமது தேரரின் பணியை பெரிதும் பாராட்டினர்.

சுற்றுசூழல் ஆர்வலர்களும் அவருக்கு ஆதரவளிப்பதாக அறிகிறேன். இதைப் பாதுகாக்க அவர்களின் முழு ஆதரவும் இருப்பது மகிழ்ச்சி அளிக்கிறது.

குறிப்பாக நாம் இந்த நாமல் தேசிய பூங்காவின் 31வது ஆண்டு நிறைவை கொண்டாடும் வேளையில் சுற்றுச்சூழல், தாவரங்கள் மற்றும் விலங்கினங்களை பாதுகாப்பதற்கு அரசாங்கம் உறுதிபூண்டுள்ளது.

அதிமேதகு ஜனாதிபதி அவர்களின் சுற்றுச்சூழல் பாதுகாப்புத் திட்டத்திலும் இது குறிப்பிடப்பட்டுள்ளது.

30 ஆண்டுகளுக்கும் மேலாக ராகுல தேரரின் அர்ப்பணிப்புக்காக நான் அவருக்கு எனது நன்றியைத் தெரிவித்துக் கொள்கிறேன். எந்த இலாப நோக்கமும் இல்லாமல் வேலை செய்யும் நேரடியான துறவியும் கூட.

எவரேனும் ஒருவருக்கு ஏதாவது கூற வேண்டும் என்றால் அதை அவர் தைரியமாக கூறுவார். அரசாங்கம் என்ற ரீதியில் இங்கு ஏதாவது அபிவிருத்தி ஏற்பட வேண்டுமாயின் அதனை நிச்சயம் செய்வோம் என்பதை இத்தருணத்தில் ஞாபகப்படுத்துவதில் மிகவும் மகிழ்ச்சியடைகிறேன்.

எமது வணக்கத்துக்குரிய தேரர்களால் எமது நாட்டிற்கு பெரும் சேவை செய்ய முடியும் எனவும் நான் உறுதியாக நம்புகிறேன். அந்தச் சேவையை மிகச் சிறப்பாகச் செய்வதற்குத் தேவையான உடல் மற்றும் மன வலிமையும், ஆரோக்கியமும், நீண்ட ஆயுளும் நமது ராகுல தேரருக்கு கிடைக்கட்டும்! என பிரார்த்திக்கிறேன்.

குறித்த சந்தர்ப்பத்தில் அமைச்சர் நாமல் ராஜபக்ஷ, இராஜாங்க அமைச்சர் விதுர விக்கிரமநாயக்க, முன்னாள் சபாநாயகர் கரு ஜயசூரிய, பிரதமரின் மேலதிக செயலாளர் ஹர்ஷ விஜேவர்தன, ஜனாதிபதியின் பேச்சாளர் கிங்ஸ்லி ரத்நாயக்க ஆகியோர் கலந்துகொண்டனர்.