Thaenaaram | Tamil Obituary Notices | Remembrance Notices | Tamil Death Notices

விபத்தில் சிக்கிய பொலிஸ் மரணம்

யாழ்ப்பாணத்தை சேர்ந்த பொலிஸ் உத்தியோகத்தர் விபத்தில் படுகாயமடைந்து மூன்று மாதங்களின் பின்னர் சிகிச்சை பலனின்றி நேற்று திங்கள் இரவு உயிரிழந்தார்.

சுன்னாகம் - வலியபுலத்தை சேர்ந்த கோணேஸ்வரன் ஹரி பிரணவன் (வயது29) என்பவரே இவ்வாறு உயிரிழந்தார்.

யாழ்ப்பாணம் தலைமையக பொலிஸ் நிலையத்தில் பணியாற்றி வந்த இவர், கடந்த ஜுன் மாதம் 13ஆம் திகதி இரவு கடமை முடிந்து மோட்டார் சைக்கிளில் வீடு திரும்பிக் கொண்டிருந்தார். அப்போது, முன்னால் சென்றுகொண்டிருந்த சைக்கிளுடன் மோதி விபத்துக்கு இலக்கானார்.

பலாலி வீதியில் ஊரெழு பகுதியில் இடம்பெற்ற இந்த விபத்தில், மயக்கமடைந்த பொலிஸ் உத்தியோகத்தரை அங்கிருந்தவர்கள் யாழ். போதனா மருத்துவ மனையில் சேர்த்தனர். அதிதீவிர சிகிச்சைப் பிரிவில் சிகிச்சை பெற்று வந்த நிலையில் அது பலனளிக்காமல் பொலிஸ் உத்தியோகத்தர் நேற்று முன்தினம் இரவு உயிரிழந்தார்.

இவரின் மரண விசாரணைகளை யாழ். போதனா மருத்துவமனையின் திடீர் மரண விசாரணை அதிகாரி நமசிவாயம் பிறேம்குமார் மேற்கொண்டார்.

நிராகரிக்கப்பட்ட குற்ற ஒப்புதல் வாக்குமூலங்கள்

பயங்கரவாத தடுப்பு சட்டத்தின் கீழ் கைது செய்யப்பட்டு தடுத்து வைக்கப்பட்டுள்ள மூன்று பேரின் குற்ற ஒப்புதல் வாக்குமூலங்கள் வவுனியா மேல் நீதிமன்றால் நிராகரிக்கப்பட்டன.

செவ்வாய்க் கிழமை (27) வவுனியா மேல் நீதிமன்றத்தில் நீதிபதி மாணிக்கவாசகர் இளஞ்செழியன் முன்னிலையில் வழக்கு தொடர்பான உண்மை விளம்பல் விசாரணை நடந்தபோதே, பிரதிவாதிகளின் குற்ற ஒப்புதல் வாக்குமூலங்கள் நிராகரிக்கப்பட்டன.

பயங்கரவாத தடுப்பு சட்டத்தின் 16ஆவது சரத்தின் கீழ் உதவி பொலிஸ் அத்தியட்சகர் தரப்பிலான உயர் அதிகாரிகளால், மூன்று பிரதிவாதிகளிடமிருந்து தனித்தனியாக குற்ற ஒப்புதல் வாக்குமூலங்கள் பதிவு செய்யப்பட்டன. அதனை ஏற்றுக் கொள்ளுமாறு முன்வைக்கப்பட்ட விண்ணப்பம் விசாரணைகளின் பின்னர் நேற்று (27) நிராகரிக்கப்பட்டது.

வழக்கின் முதலாம் பிரதிவாதியின் குற்ற ஒப்புதல் வாக்குமூலத்தை யாழ்ப்பாணம் மேல் நீதிமன்ற நீதிபதி இரா. கண்ணன் நிராகரித்ததுடன், அதற்கான கட்டளையை வவுனியா மேல் நீதிமன்றத்துக்கு நேற்று அனுப்பியிருந்தார்.

ஏனைய இரண்டு பிரதிவாதிகளின் குற்ற ஒப்புதல் வாக்குமூலங்களும் வவுனியா மேல் நீதிமன்ற நீதிபதி மாணிக்கவாசகர் இளஞ்செழியனால் நேற்று நிராகரிக்கப்பட்டன.

இந்தக் குற்ற ஒப்புதல் வாக்குமூலங்களை தாம் வழங்கவில்லை என வழக்கு விசாரணையின்போது பிரதிவாதிகள் மன்றுக்குத் தெரிவித்தனர். இதற்கமைய, உயர் பொலிஸ் அதிகாரிகளால் சமர்ப்பிக்கப்பட்ட விண்ணப்பங்களை நீதிமன்றம் நிராகரித்தது.

அத்துடன், வழக்கு விசாரணையை எதிர்வரும் ஒக்ரோபர் 14 ஆம் திகதிக்கும் ஒத்தி வைத்தது.

இதேவேளை, பிரதிவாதிகள் மூவரும் கடந்த 12 வருடங்களாக வெலிக்கடை சிறைச்சாலையில் தடுத்து வைக்கப்பட்டுள்ளனர். இவர்கள் மீது, 2009 ஆண்டு இறுதி போரின்போது முள்ளிவாய்க்காலில் விடுதலைப் புலிகள் அமைப்பினருடன் பயங்கரவாத செயலில் ஈடுபட்டனர் என்று பொலிஸார் குற்றஞ்சாட்டியுள்ளனர் என்பது குறிப்பிடத்தக்கது.