Thaenaaram | Tamil Obituary Notices | Remembrance Notices | Tamil Death Notices

1500 கிலோ கிராம் மஞ்சள் கைப்பற்றப்பட்டது

இலங்கைக்குசட்டவிரோதமான முறையில் கொண்டு வரப்பட்ட 1500 கிலோ கிராம் மஞ்சளை இராணுவத்தினர் கைப்பற்றினர்.

சட்டவிரோதமான முறையில், இறக்குமதி செய்வதற்கு தடைசெய்யப்பட்ட ஒரு தொகை மஞ்சள் கடத்தப்படுவது தொடர்பில் இராணுவ புலனாய்வு பிரிவினருக்கு கிடைத்த இரகசியத் தகவலின் அடிப்படையில் குறித்த பொதிகள் மீட்கப்பட்டன.

36 பாரிய மூடைகளில் மறைத்து வைக்கப்பட்டிருந்த இந்த மஞ்சளை இலங்கை இராணுவம் மற்றும் பொலிஸ் விசேட அதிரடிப்படையினர் இணைந்து நேற்று முன்தினம் கைப்பற்றினர்.

இதன்போது, பூநகரி வலைப்பாடு பகுதியைச் சேர்ந்த 23 வயதுடைய சந்தேக நபர் ஒருவரும் கைது செய்யப்பட்டார்.

மீட்கப்பட்ட மஞ்சள் ஜெயபுரம் பொலிஸாரிடம் ஒப்படைக்கப்பட்டது. இந்தச் சம்பவம் தொடர்பில் பொலிஸார் மேலதிக விசாரணைகளை மேற்கொண்டுள்ளனர்.

கள்ளமாக மணல் ஏற்றி வந்தவர் வாகனத்துடன் கைது

உரிய அனுமதிகள் இன்றி மணல் ஏற்றி வந்த டிப்பர் சாரதியை கைது செய்துள்ள அச்சுவேலி பொலிஸார் டிப்பர் வாகனத்தையும் கைப்பற்றினர்.

பளைப் பகுதியில் இருந்து உரிய அனுமதிகள் இன்றி, சட்டவிரோதமான முறையில் மணல் ஏற்றியவாறு டிப்பர் வாகனம் ஒன்று வருவதாக புதன்கிழமை (07) அச்சுவேலி பொலிஸாருக்கு இரகசிய தகவல் கிடைத்துள்ளது.

தகவலின் பிரகாரம் வீதி சோதனை நடவடிக்கைளில் அச்சுவேலி பொலிஸார் ஈடுபட்டிருந்தவேளை அனுமதியின்றி மணல் ஏற்றி வந்த டிப்பர் வாகனத்தை வழிமறித்து சாரதியை கைது செய்ததுடன், மணலுடன் வாகனத்தையும் கைப்பற்றி பொலிஸ் நிலையத்திற்கு கொண்டு சென்றனர்.

கைது செய்யப்பட்டுள்ள சாரதி புத்தூர் பகுதியைச் சேர்ந்தவர் எனவும், மேலதிக விசாரணைகளின் பின்னர் மல்லாகம் நீதவான் நீதிமன்றில் முற்படுத்த நடவடிக்கைகளை எடுத்துள்ளதாகவும் பொலிஸார் தெரிவித்தனர்.

யாழ்ப்பாணம் ஐந்துச் சந்திப் பகுதியில் தனியார் விடுதி ஒன்றை நடத்தி, அங்கு வயதுக்கு குறைந்த சிறுவர்களைப் பணிக்கு அமர்த்தி, யாழ்ப்பாணம் நகரப் பகுதியில் ஊதுபத்தி விற்பனையில் ஈடுபடச் செய்த காரணமாக இருந்த விடுதி வியாழனன்று (08) சீல் வைத்து இழுத்து மூடப்பட்டது.

யாழ்ப்பாணம் நீதவான் நீதிமன்ற நீதிவான் ஆனந்தராஜா இந்த உத்தரவை பிறப்பித்தார்.

புத்தளம் பகுதியில் இருந்து சிறுவர்களை அழைத்து வந்து அவர்களிடம் ஊதுபத்திகளை வழங்கி விற்பனையில் ஈடுபடுத்தியதாக பூட்டுக் கடை நாதன் என்பவருக்கு சொந்தமான நாதன் விடுதியே வியாழனன்று சீல் வைத்து மூடப்பட்டது.
யாழ்ப்பாணம் பொலிஸாரினால் கடந்த மாதம் குறித்த விடுதியில் இருந்து ஏழு சிறு பெண் பிள்ளைகள், மூன்று ஆண் பிள்ளைகள் உட்பட 11 பேர் யாழ்ப்பாணம் சிறுவர் பிரிவு பொலிஸாரினால் மீட்கப்பட்டிருந்தனர்.

இது தொடர்பான வழக்கு நேற்று யாழ்ப்பாணம் நீதவான் நீதிமன்றத்தில் எடுத்துக் கொள்ளப்பட்டபோது, நீதவான் குறித்த விடுதியினை சீல் வைத்து மூடுமாறு நீதிமன்ற உத்தியோகத்தர்களுக்கு கட்டளை பிறப்பித்தார்.