Thaenaaram | Tamil Obituary Notices | Remembrance Notices | Tamil Death Notices

சட்ட விரோத செயல்களுடன் தொடர்புடைய பலர் கைது

கிளிநொச்சி தர்மபுரம் பொலிஸ் பிரிவுக்கு உட்பட்ட பல பகுதிகளில் கடந்த 19ஆம் திகதி தொடக்கம் 21 திகதி வரையான காலப்பகுதியில் சட்ட விரோத செயல்களுடன் தொடர்புடைய பலர் கைது செய்யப்பட்டுள்ளனர்.

கடந்த 19ஆம் திகதி 15 லீற்றர் சட்டவிரோத கசிப்பை மோட்டார் சைக்கிள் மூலம் வேறொரு பகுதிக்கு கொண்டு சென்ற இரண்டு சந்தேக நபர்கள் தர்மபுரம் பொலிஸாரால் கைது செய்யப்பட்டனர்.

அன்றைய தினமே சுண்டிக்குளம் கடல்கரைப் பகுதியில் ஒருவரின் சங்கிலியை அறுத்து தப்பிச் செல்ல முற்பட்டவர் பொலிஸாரிடம் அகப்பட்டபோது அவர் சங்கிலியை விழுங்கியுள்ளார். உடனடியாக அவர் அருகிலுள்ள வைத்தியசாலைக்கு கொண்டு செல்லப்பட்டு அவரிடமிருந்து சங்கிலியை பொலிஸார் மீட்டனர்.

கடந்த 20ஆம் திகதி 2500 மில்லி கிராம் ஹெரோயின் போதைப் பொருளை உடைமையில் வைத்திருந்த சந்தேகநபர் ஒருவர் கைது செய்யப்பட்டார்.

இதேவேளை, சில தினங்களுக்கு முன்பு மோட்டார் சைக்கிள் ஒன்று திருடப்பட்டு காட்டுக்குள் மறைத்து வைக்கப்பட்டிருந்த நிலையில் 21ஆம் திகதி சந்தேக நபர் கைதானதுடன் மோட்டார் சைக்கிளும் பொலிஸாரால் மீட்கப்பட்டது.

அன்றைய தினமே கல்லாற்று பாடசாலைக்குச் சொந்தமான நீர் இறைக்கும் பம்பி திருட்டுச் சம்பவத்துடன் தொடர்புடைய சந்தேக நபர் ஒருவர் கைது செய்யப்பட்டார். திருட்டுக்கு பயன்படுத்தப்பட்ட மோட்டார் சைக்கிளும் பறிமுதல் செய்யப்பட்டதுடன் சந்தேக நபரிடம் இருந்து மூன்று தண்ணீர் பம்பிகளையும் பொலிஸார் மீட்டனர்.

இதேவேளை, வாகன அனுமதிப்பத்திரம் இன்றி மோட்டார் சைக்கிள் செலுத்திய 5 பேரை பொலிஸார் கைது செய்தனர்.

கொலைச் சம்பவத்தையடுத்து இராணுவம் கடமையில்

இலங்கை பெற்றோலியக் கூட்டுத்தாபன எரிபொருள் நிரப்பு நிலையங்களில் கண்காணிப்பு நடவடிக்கைளை தீவிரப்படுத்தும் நோக்கில் இராணுவத்தினர் ஈடுபடுத்தப்பட்டுள்ளனர்.

எரிபொருள் நிரப்பு நிலையங்களில் நிலவும் நிலைமையைக் கட்டுப்படுத்த இவ்வாறு இராணுவத்தினர் களமிறக்கப்பட்டுள்ளதாக, இராணுவப் பேச்சாளர் பிரிகேடியர் நிலந்த பிரேமரத்ன தெரிவித்தார்.

நாடு முழுவதும் உள்ள எரிபொருள் நிரப்பு நிலையங்களில் கடுமையான நெருக்கடி நிலை உருவாகியுள்ளது.

கடும் எரிபொருள் தட்டுப்பாடு காரணமாக எரிபொருள் நிலையங்களில் நீண்ட வரிசையில் பொதுமக்கள் நிற்பதே இதற்கு காரணமாகும்.

இன்றைய நாட்களில் எரிபொருளைப் பெறுவதற்குப் போராடும் மக்கள் மத்தியில் அமைதியின்மை ஏற்பட்டு வருவதை அவதானிக்க முடிகிறது.

இதன் விளைவாக, மக்களிடையே தகராறுகள் ஏற்படுவதுடன் கடந்த ஞாயிறு கொலைச் சம்பவமொன்றும் பதிவாகியது.
அத்துடன் அண்மையில் எரிபொருள் வரிசையில் காத்திருந்த முதியவர்கள் இருவர் உட்பட 3 பேர் உயிரிழந்த சம்பவங்கள் பதிவாகியுள்ளன.

இதனை தொடர்ந்து, எரிபொருள் நிரப்பு நிலையங்களில் தீவிர கண்காணிப்புகளை மேற்கொள்ளும் நோக்கில் இராணுவத்தினரை ஈடுபடுத்த தீர்மானம் எடுக்கப்பட்டதாக இராணுவப் பேச்சாளர் மேலும் தெரிவித்தார்.