Thaenaaram | Tamil Obituary Notices | Remembrance Notices | Tamil Death Notices

குளத்தில் நீராடிய இரு மாணவர்கள் உயிரிழந்தனர்

வவுனியா ஈரட்டைபெரிய குளத்தில் நேற்று வியாழக்கிழமை நீராடிய நான்கு மாணவர்களில் இருவர் உயிரிழந்தனர். மற்றைய இருவரும் ஆபத்தான நிலையில் மருத்துவமனையில் சேர்க்கப்பட்டுள்ளனர்.

இந்தச் சம்பவம் குறித்து மேலும் அறிய வருவதாவது,

15, 16 வயதுடைய குறித்த நான்கு மாணவர்களும் தமது வளர்ப்பு நாயுடன் குளத்துக்கு சென்றுள்ளனர். நாயைக் குளிப்பாட்டி நீந்திக் கொண்டிருந்த நால்வரும் நீரில் மூழ்கியுள்ளனர்.

குளத்தில் நீராடிக்கொண்டிருந்த ஏனையோர் நீரில் மூழ்கிய மாணவர்களை மீட்கும் முயற்சியில் ஈடுபட்டனர். இருவர் உயிருடன் மீட்கப்பட்ட நிலையில், ஆபத்தான நிலையில் உடனடியாக வவுனியா மாவட்ட பொது மருத்துவமனையில் சேர்க்கப்பட்டனர்.

ஏனைய இருவரையும் பொலிஸார், இராணுவத்தினரும் இணைந்து தேடினர். இதில், மற்றைய இரு மாணவர்களின் சடலங்களுமே மீட்கப்பட்டன.

சடலமாக மீட்கப்பட்ட இரு மாணவர்களின் உடல்களும் பிரேத பரிசோதனைக்காக வவுனியா மாவட்ட பொது வைத்தியசாலையில் ஒப்படைக்கப்பட்டுள்ளன. வவுனியா பொலிஸார் மேலதிக விசாரணைகளை தொடர்ந்து வருகின்றனர்.

டெங்கு தொற்று வேகமாக பரவுகின்றது

இலங்கையில் தென்மேற்கு பருவமழை தொடங்கியுள்ள நிலையில் டெங்கு தொற்று வேகமாக பரவி வருகிறது. மே மாதம் மட்டும் 6,483 டெங்கு நோயாளர்கள் பதிவாகினர் என்று தேசிய டெங்கு கட்டுப்பாட்டு பிரிவின் பணிப்பாளர் மருத்துவர் சுதத் சமரவீர தெரிவித்துள்ளார்.

மேலும், இந்த ஆண்டில் மட்டும் 24,523 பேர் டெங்கு தொற்றுக்கு இலக்காகினர். இவர்களில் நேற்று முன்தினம் சனிக்கிழமை மட்டும் 313 நோயாளர்கள் பதிவாகியுள்ளனர். அதிகளவிலான தொற்றாளர்கள் கொழும்பில் பதிவாகியுள்ளனர். அடுத்த இடங்களில், யாழ்ப்பாணம், மட்டக்களப்பு, திருகோணமலை, கேகாலை, கண்டி, காலி, இரத்தினபுரி மாவட்டங்கள் உள்ளன.

கடந்த 3 மாதங்களாக டெங்கு நோயாளர் தொகை அதிகரித்து வரும் நிலையில், தென்மேற்கு பருவ மழையால் எதிர்வரும் நாட்களில் டெங்கு நோயாளர்கள் எண்ணிக்கை வெகுவாக அதிகரிக்கும். எனவே பொதுமக்கள் நோய் வராமல் தடுக்க வீடுகள், அலுவலக வளாகங்கள், பொது இடங்களில் நுளம்பு பெருகும் இடங்களை அழிக்க வேண்டும்.

பொருளாதார நெருக்கடி, கோவிட் 19 தாக்கம் காரணமாக டெங்கு கட்டுப்பாடு புறக்கணிக்கப்பட்டது. இதன் விளைவே டெங்கு தொற்று அதிகரிப்பு. 24 மணி நேரத்துக்கு மேலாக காய்ச்சல் நீடித்தால் உடனடியாக மருத்துவ சிகிச்சை பெறுவதும் அவசியம் என்றும் அவர் அறிவுறுத்தினார்.

இருசாராரும் பேசித்தீர்கப்பட வேண்டியது

“கச்சதீவை தமிழகம் மீள பெறுவதனால் இலங்கை மீனவர்களின் வாழ்வாதாரம் மிகவும் பாதிப்படையும் என்பதனை தமிழக முதல்வர் அனுதாபத்துடன் அணுகி கச்சதீவை மீளப்பெறுவதற்கான விடயங்களை வலியுறுத்தாது இரு சாராரிடமும் பேசித் தீர்த்து செயல்பட வேண்டும்”, என வடக்கு மாகாண சபை அவைத்தலைவர் சி.வி.கே. சிவஞானம் தெரிவித்தார் .

யாழ்ப்பாணத்தில் அவர் நடத்திய ஊடக சந்திப்பிலேயே இதனை தெரிவித்தார்.

மேலும், இலங்கை தமிழர்களுடைய பிரச்னைகளில் கூடுதலான கரிசனை எடுக்கின்ற தலைவர்களில் தமிழக முதலமைச்சர் ஸ்டாலினையும் ஒருவராகக் கருதுகின்றோம்.

தமிழக மீனவர்களின் மீன்பிடியானது கச்சதீவு வரை செல்லவேண்டும் என்ற கோரிக்கையின் அடிப்படையில், கச்சதீவை மீண்டும் வழங்குமாறு கேட்டுள்ளார்கள் .

வட, கிழக்கு மீனவர்கள் தொழில் புரியும் கடற்கரையோரங்களில் , சிங்கள மீனவ தொழிலார்களின் சுரண்டல் மற்றும் தமிழக மீனவர்களின் சுரண்டலால் தமிழ் மக்கள் பெரும் பிரச்னைகளை எதிர்நோக்குகின்றனர். எனவே, இரண்டு பக்கங்களிலும் உள்ள பிரச்னைகளை தீர்த்து வைப்பதற்கான நடவடிக்கைகளை தமிழக முதல்வர் எடுப்பதுடன் , இலங்கை வாழ் தமிழர்களையும் தனது தமிழ் மக்களாக பார்க்க வேண்டும்.

கச்சதீவை தமிழகம் மீள பெறுவதனால் இலங்கை மீனவர்களின் வாழ்வாதாரம் மிகவும் பாதிப்படையும் என்பதை தமிழக முதல்வர் அனுதாபத்துடன் அணுகி, கச்சதீவை மீளப்பெறுவதற்கான விடயங்களை வலியுறுத்தாது இரு சாராரிடமும் பேசி தீர்த்து செயல்படுவது என்பது அவரால் மாத்திரமே முடியும்.

இதேவேளை 21ஆம் திருத்தத்தில் ஆரம்பத்தில் உள்ள மொழி, மத உரிமை , மனித அடிப்படை உரிமை அப்படியே இருக்கத்தக்கதாக 20ஆவது திருத்தத்தில் ஜனாதிபதிக்கு வழங்கப்பட்ட அதிகாரங்களை மீள பாராளுமன்றத்திற்கு போகிற வேலையே தவிர, தமிழ் மக்களுக்கு சார்பான, தீர்வான எந்த விடயங்களும் 21ஆம் திருத்தத்தில் இல்லை.

மக்களுக்கு சார்பான விடயமாக எந்த விடயங்களும் 21ஆம் திருத்தத்தில் இல்லை. இது அபரீவிதனமான அதிகாரங்களை தொடர்ந்தும் தக்க வைப்பதற்கான ஏற்பாடுகளாவே நான் பார்க்கிறேன்.
எனவே 20ஆவது திருத்தமோ 21ஆவது திருத்தமோ வரப்போவதில்லை என்பது எனது சொந்தக்கருத்து, என்றார் .