Thaenaaram | Tamil Obituary Notices | Remembrance Notices | Tamil Death Notices

ஜனாதிபதியின் வருகைக்கு எதிர்ப்பு தெரிவித்து வலிந்து காணாமல் ஆக்கப்பட்டவர்களின் உறவுகளால் முன்னெடுக்கப்பட்ட போராட்டத்தை பொலிஸார் தடுத்து நிறுத்தியமையால் வவுனியா-மன்னார் பிரதான வீதியில் பதற்றமான சூழல் ஏற்பட்டதுடன், பொலிஸாருக்கும் போராட்டக்காரர்களுக்கும் இடையில் முரண்பாடு ஏற்பட்டது.

வவுனியா பல்கலைக்கழகத்தின் ஆரம்ப விழா நிகழ்வு பம்பைமடுப் பகுதியில் அமைந்துள்ள பல்கலைக்கழக வளாகத்தில் ஜனாதிபதியின் தலைமையில் இன்று வெள்ளிக்கிழமை காலை இடம்பெற்றது.

இதன்போது ஜனாதிபதியின் வருகைக்கு எதிர்ப்பு தெரிவித்து பல்கலைக்கழகத்துக்கு முன்பாக காணாமல்போனவர்களின் உறவினர்களால் ஆர்ப்பாட்டம் ஒன்று ஏற்பாடு செய்யப்பட்டிருந்தது.

ஆர்ப்பாட்டம் இடம்பெறவிருந்த பகுதிக்கு செல்ல முற்பட்ட காணாமற்போனவர்களின் உறவினர்களை பம்பைமடு இராணுவச் சோதனைச் சாவடியில் குவிக்கப்பட்டிருந்த பொலிஸார் மற்றும் விசேட அதிரடிப்படையினர் வழிமறித்து தடுத்து நிறுத்தினர். இதனால் ஆர்பாட்டக்காரர்களுக்கும் பொலிஸாருக்கும் இடையில் முரண்பாடு ஏற்பட்டதுடன், குழப்பநிலை தோன்றியது.

கொலைக்குற்றவாளியே நாட்டின் ஜனாதிபதியாக இருக்கிறார். அவர்களை நம்பியே நாம் எமது பிள்ளைகளை ஒப்படைத்தோம். எனவே அவரிடம் நாம் சில கேள்விகளை கேட்கவேண்டும். அதற்கு அனுமதி வழங்குமாறு போராட்டக்காரர்கள் தெரிவித்தபோதும் அதனை பொருட்படுத்தாத பொலிஸார் அவர்களை முன்செல்ல அனுமதிக்கவில்லை. இதனால் குறித்த பகுதியில் பதற்றமான சூழல் ஏற்பட்டிருந்தது.
இதனையடுத்து ஜனாதிபதியின் பாதுகாப்புப் பிரிவின் அதிகாரிகள் குறித்த போராட்டக்காரர்களுடன் கலந்துரையாடியதுடன் இருவரை மாத்திரம் வந்து ஜனாதிபதியை சந்திக்குமாறு கோரினர்.

அதற்கு எதிர்ப்பு தெரிவித்த அவர்கள், நாம் அவரை சந்திக்கவரவில்லை. எங்கள் அனைவரையும் முன்செல்ல அனுமதிக்குமாறு கோரியதுடன் கொலைக்குற்றவாளி எப்படி நீதிபதியாக மாறமுடியும் என்றனர்?

இருமணி நேரத்துக்கும் மேலாக குறித்த பகுதியில் பொலிஸார் மற்றும் விசேட அதிரடிப்படையினர் அவர்களை வழிமறித்து முன்செல்ல முடியாதவாறு நின்றனர். இதனை அடுத்து போராட்டக்காரர்கள் திரும்பிச்சென்றனர்.