Thaenaaram | Tamil Obituary Notices | Remembrance Notices | Tamil Death Notices

மருந்துகள் பற்றாக்குறை - கவனயீர்ப்புப் போராட்டம் - முல்லைத்தீவு

முல்லைத்தீவு மாவட்டத்தில் வைத்தியசாலையில் நிலவும் மருந்து தட்டுப்பாட்டை நீக்கக் கோரி மாவட்ட செயலகத்துக்கு முன்பாக கவனயீர்ப்பு போராட்டம் ஒன்று முன்னெடுக்கப்பட்டது.

தற்போது நாட்டில் ஏற்பட்டுள்ள பொருளாதார நெருக்கடியில் மக்கள் உணவுக்காக பல்வேறு சிரமங்களை எதிர்கொண்டு வருகின்றார்கள்.
இந்த வகையில் மக்களின் வாழ்க்கைச் செலவு மேலும் மேலும் அதிகரித்து செல்வதுடன் நாட்டில் மருத்துவத் துறையிலும் இது பாதிப்பை ஏற்படுத்தியுள்ளது.

பல்வேறுபட்ட முக்கிய மருந்துகளுக்கு தட்டுப்பாடு நிலவுவதுடன் வைத்தியசாலைகளில் இலவசமாக மருத்துவத்தை பெற்றுக்கொள்ளமுடியாத நிலையில் மக்கள் உள்ளனர்.

இலங்கையில் வறுமைக்குட்பட்ட மாவட்டங்களில் ஒன்றாக முல்லைத்தீவு மாவட்டமும் காணப்படுகின்றது. கிராம புறங்களில் வறுமைக்குட்பட்ட குடும்பங்கள் அதிகளவில் காணப்படும் மாவட்டமாகவும் முல்லைத்தீவு மாவட்டம் காணப்படுகின்றது.

இந்த நிலையில் முல்லைத்தீவு மாவட்டத்தில் மாவட்ட வைத்தியசாலையில் மருந்துக்கான தட்டுப்பாடு மற்றும் மருத்துவ உபகரணங்களுக்கான தட்டுப்பாடு என்பனவற்றை நிவர்த்தி செய்யக் கோரி வடக்கு-கிழக்கு பெண்கள் ஒன்றியத்தினரால் நேற்று (06.12.2022) போராட்டம் நடத்தப்பட்டது.

முல்லைத்தீவு மாவட்ட செயலகத்துக்கு முன்பாக இடம்பெற்ற கவனயீர்ப்புப் போராட்டத்தின் இறுதியில் ஜனாதிபதிக்கான மனு வாசிக்கப்பட்டு முல்லைத்தீவு மாவட்ட செயகத்தில் மேலதிக அரசாங்க அதிபர் க. கனகேஸ்வரனிடம் கையளிக்கப்பட்டது.