Thaenaaram | Tamil Obituary Notices | Remembrance Notices | Tamil Death Notices

சட்டவிரோத கனியவள மண் அகழ்வு, காற்றாலை போன்ற பிரச்சனைகள் தொடர்ந்தும் எமது கரிசனைக்குரிய விடயங்களாக உள்ளன.

நம்மிடையே இருக்கக்கூடிய வேறுபாடுகளைக் களைந்து ஒற்றுமையும் ஒன்றிப்பும் நிறைந்தவர்களாக நாம் மாற அழைக்கப்பட்டுள்ளோம்.

மக்களின் ஜனநாயக உரிமைகளுக்கு மதிப்புக் கொடுக்குமாறு இன்றைய அரசாங்கத்துக்கு நாம் வேண்டுகோள் விடுக்கின்றோம்.

“உள்ளத்தில் உறுதியற்றோரே திடன் கொள்ளுங்கள். அஞ்சாதிருங்கள். இதோ நம் கடவுள் வருவார்” என மன்னார் மறைமாவட்ட ஆயர் மேதகு பிடேலிஸ் லயனல் இம்மானுவேல் பெனாண்டோ ஆண்டகை மன்னார் மறைமாவட்ட மக்களுக்கு திருவருகைக்காலத் திருமடலில் தெரிவித்துள்ளார்.

இம் மடலில் ஆயர் மேலும் தெரிவித்திருப்பதாவது;

உலக மீட்பராம் இயேசுவினுடைய பிறப்பின் பெருவிழாவுக்கு நம்மை ஆயத்தம் செய்யும் காலமாக இத்திருவருகைக்காலம் நமக்கு தரப்படுட்டுள்ளது.

இக்காலத்தில் நாம் இயேசுவினுடைய இரண்டுவிதமான வருகைக்காக நம்மை ஆயத்தம் செய்ய கத்தோலிக்க மக்களாகிய நாம் அழைக்கப்படுகின்றோம்.

முதலாவது வருகையானது, வரலாற்றில் ஏற்கனவே நடந்தேறிய இயேசுவின் வருகையாகும். இவ்வருகையில் இறைவனாம் கிறிஸ்து மனிதவதாரமெடுத்து நம்மையெல்லாம் மீட்க வந்தார். இவ்வருகையை நாங்கள் அனைவரும் கிறிஸ்மஸ் விழாவாகக் கொண்டாடுகின்றோம்.

இரண்டாவது வருகையானது, உலகின் படைப்புகளுக்கான நடுத்தீர்வையாகும். இந்நாளில் இறைவன் நடுவராகவும், நீதிபதியாகவும் திகழ்வார்.

நாம் அனைவரும் கூட்டொருங்கியக்கத் திருச்சபையாக மாறும் பயணத்தில் பயணித்துக் கொண்டிருக்கின்றோம். கூட்டொருங்கியக்கத் திருச்சபையாக மாறவேண்டும் என்று திருத்தந்தையின் அறைகூவலை ஆண்டவரிடமிருந்து பெறுகின்ற ஓர் அழைப்பாக நாம் கொள்ளவேண்டும்.

ஆகவே நம்மிடையே இருக்கக்கூடிய வேறுபாடுகளைக் களைந்து ஒற்றுமையும் ஒன்றிப்பும் நிறைந்த திருச்சபையாக நாம் மாற அழைக்கப்பட்டுள்ளோம்.