Thaenaaram | Tamil Obituary Notices | Remembrance Notices | Tamil Death Notices

வன்னி மாவட்டத்தில் நடைபெறும் மாவட்ட அபிவிருத்தி குழுக் கூட்டங்களை அந்தந்த மாவட்டங்களில் ஒரே நாளில் வைப்பதால் பாராளுமன்ற உறுப்பினர்களாகிய நாங்கள் கலந்து கொள்வதில் பல சிரமங்களை எதிர்நோக்குவதுடன், ஒரு மாவட்டத்திலும் சரியான முறையில் பிரச்சனைகளை ஆராய்ய முடியாது இருப்பதாக வன்னி பாராளுமன்ற உறுப்பினர்கள் செல்வம் அடைக்கலநாதன் மற்றும் சாள்ஸ் நிர்மலநாதன் கூட்டாக இவ் வேண்டுகோளை விடுத்துள்ளனர்.

மன்னார் மாவட்ட அபிவிருத்திக் குழுக்கூட்டம் இதன் தலைவரும் வன்னி பாராளுமன்ற உறுப்பினருமான காதர் மஸ்தான் தலைமையில் வியாழக்கிழமை (31.03.2022) காலை மன்னார் மாவட்ட செயலகத்தில் இடம்பெற்றது.

இக் கூட்டத்தில் வடக்கு மாகாண ஆளுநர் ஜீவன் தியாகராஜா, வன்னி பாராளுமன்ற உறுப்பினர்கள் ரிசாட் பதியுதீன், செல்வம் அடைக்கலநாதன், சாள்ஸ் நிர்மலநாதன், திலீபன் ஆகியோர் உட்பட அரசாங்க அதிபர், திணைக்கங்களின் உயர் அதிகாரிகளும் இதில் கலந்து கொண்டனர்.

இக் கூட்டத்தின்போது வன்னி பாராளுமன்ற உறுப்பினர்கள் சாள்ஸ் நிர்மலநாதன் மற்றும் செல்வம் அடைக்கலநாதன் கருத்து தெரிவிக்கையில்;

வியாழக்கிழமை (31) வன்னி தேர்தல் தொகுதியான மன்னார் மாவட்டத்திலும், முல்லைத்தீவு மாவட்டத்திலும் இந்த மாவட்ட அபிவிருத்திக்குழுக் கூட்டங்களை ஒரே நாளில் கூட்டுவதற்கான நடவடிக்கையை மேற்கொண்டுள்ளீர்கள்.

இரண்டு மாவட்டங்களிலும் ஒரே நாளில் இவ்வாறான கூட்டங்களை கூட்டும்போது இரண்டு மாவட்டங்களிலும் சரியான முறையில் அபிவிருத்தி திட்டங்களை ஆராய முடியாது இருப்பதுடன் மக்களின் பிரச்சனைகளை முழுமையாக ஆராய முடியாது, அவசரப்பட்டு கூட்டங்களை முடிக்க வேண்டிய நிலையே உள்ளது.

ஆகவே, இரண்டு மாவட்டங்களுக்கும் ஒருவரே தலைவராக இருப்பதால், இரு மாவட்டங்களிலும் இவ்வாறான கூட்டங்களை வெவ்வேறு தினங்களில் கூடுவதற்கான நடவடிக்கை எடுக்கப்படும் பட்சத்தில், இங்கு கலந்து கொள்ளும் திணைக்களங்கள், மற்றும் பொது அமைப்புக்களின் பிரச்சனைகளை நன்கு கேட்டு அறிந்து நடவடிக்கைகளை மேற்கொள்ள சாத்தியக்கூறுகள் அதிகமாக இருக்கும் என வன்னி பாராளுமன்ற உறுப்பினர்கள் இக்கூட்டத்தில் ஒரே குரலில் இக் கோரிக்கையை முன்வைத்தனர்.

இதற்கு இக் குழுக்கூட்டத்தில், இதன் தலைவர் காதர் மஸ்தான் பதிலளிக்கையில், எதிர்வரும் காலத்தில் இவ்வாறான நிலை ஏற்படாது இருப்பதற்கான நடவடிக்கை எடுக்கப்படும் என உத்தரவாதம் அளித்தார்.