Thaenaaram | Tamil Obituary Notices | Remembrance Notices | Tamil Death Notices

கடந்த ஜனவரி மாதம் 27ஆம் திகதி சாய்ந்தமருது பிரதேசத்தில் மூதாட்டி ஒருவர் கொலை செய்யப்பட்ட சம்பவம் தொடர்பில் தலைமறைவாக இருந்து வந்த சந்தேக நபர் ஒருவர் கைது செய்யப்பட்டுள்ளார்.

நேற்று சனிக்கிழமை (02) இரவு, மட்டக்களப்பு விடுதி ஒன்றில் வைத்து சாய்ந்தமருது பொலிஸாரினால் இவர் சுற்றிவளைக்கப்பட்டு, கைது செய்யப்பட்டார் என சாய்ந்தமருது பொலிஸ் நிலையப் பொறுப்பதிகாரி எஸ்.எல். சம்சுதீன் தெரிவித்தார்.

கல்முனைக்குடி மதரஸா வீதியை சேர்ந்த 47 வயதுடைய குடும்பஸ்தர் ஒருவரே இவ்வாறு கைது செய்யப்பட்டதாக அவர் மேலும் தெரிவித்தார்.

கடந்த ஜனவரி 27ஆம் திகதி அதிகாலை வேளையில், சாய்ந்தமருது-15 ஆம் பிரிவு புதுப்பள்ளி வீதியிலுள்ள ஒழுங்கையில் அமைந்துள்ள தனது வீட்டில், தனிமையில் நித்திரையில் ஆழ்ந்திருந்த நிலையில், 81 வயதுடைய சுலைமான் செய்யது வுஹாரி என்பவர் கொலை செய்யப்பட்டு, அவர் வசமிருந்த தங்க ஆபரணங்கள் மற்றும் பணம் என்பன கொள்ளையிடப்பட்டிருந்தன.

இதையடுத்து சி.சி.ரி.வி. வீடியோ காட்சிகள் பரிசோதிக்கப்பட்டு, கொலையாளி அடையாளம் காணப்பட்டிருந்த நிலையில், அவர் தலைமறைவாகியிருந்தார். இவரைத் தேடிக்கண்டு பிடிப்பதற்காக குற்றப்புலனாய்வுப் பிரிவினரின் உதவியுடன் சாய்ந்தமருது பொலிஸார் தீவிர நடவடிக்கைகளில் ஈடுபட்டு வந்தனர்.

இதன் தொடர்ச்சியாக மட்டக்களப்பிலுள்ள விடுதி ஒன்றில் குடும்பத்துடன் தலைமறைவாகியிருந்த நிலையில், சனிக்கிழமை இரவு சிவில் உடை தரித்த பொலிஸாரினால் இவர் அதிரடியாக கைது செய்யப்பட்டுள்ளார். தற்போது மேலதிக விசாரணைகளை சாய்ந்தமருது பொலிஸார் மேற்கொண்டு வருகின்றனர் எனவும் நீதிமன்றத்தில் ஆஜர் செய்ய நடவடிக்கை எடுத்துள்ளதாகவும் பொலிஸ் பொறுப்பதிகாரி சம்சுதீன் மேலும் தெரிவித்தார்.